தமிழ்நாடு சட்டப்பேரவைக் கூட்டம் – கவர்னர் அறிவிப்பு!

2022-ஆம் ஆண்டில் தமிழ்நாடு சட்டப்பேரவையின் முதல் கூட்டத் தொடர் ஜனவரி 5-ந் தேதி காலை 10:00 மணிக்கு கலைவாணர் அரங்கில் சட்டப்பேரவை கூட்டத்தொடர் தொடங்கும் என தமிழக கவர்னர் ஆர்.என். ரவி அறிவித்துள்ளார்.

கொரோனா மற்றும் ஒமைக்ரான் தொற்று பரவல் காரணமாக சட்டப்பேரவை கூட்டத்தொடர் கலைவாணர் அரங்கில் தான் நடைபெறும் என்று தெரிவிக்கப்பட்டுள்ளது. ஆண்டின் முதல் கூட்டம் என்பதால் தமிழக ஆளுநர் ஆர்.என். ரவி அவர்களின் உரையுடன் தமிழ்நாடு சட்டப்பேரவை கூடுகிறது. முன்னதாக, 2022-ஆம் ஆண்டு ஜனவரி 5-ந் தேதி காலை 10:00 மணிக்கு புனித ஜார்ஜ் கோட்டையில் தமிழ்நாடு சட்டப்பேரவை கூட்டத்தொடர் தொடங்கும் என ஆளுநர் மாளிகையிலிருந்து அறிவிப்பு வெளியிட்டபட்டது.

தமிழ்நாடு சட்டப்பேரவை கூட்டத்தொடர் குறித்து சபாநாயகர் அப்பாவு கடந்த டிசம்பர் 13ம் தேதி தனது பேட்டியில் தெரிவித்திருந்தார்.

தற்போது, தமிழகத்தில் கொரோனா தொற்று பரவல் அதிகரிக்கத் தொடங்கியிருப்பதால், ஊரடங்கு கட்டுப்பாடுகள் ஜனவரி 10ம் தேதி வரை அறிவிக்கப்பட்டுள்ளது.

இதையடுத்து, சென்னை வாலாஜா சாலையில் உள்ள கலைவாணர் அரங்கின் 3வது தளத்தில் தமிழ்நாடு சட்டப்பேரவை ஜனவரி 5ம் தேதி கூட உள்ளது என தமிழக ஆளுநர் மாளிகையிலிருந்து அறிவிப்பு வெளியிடப்பட்டுள்ளது.