June 21, 2021

தனியார் மருத்துவமனைகளில் ரெம்டெசிவிர் நேரடி விற்பனை – அரசு அறிவிப்பு!

மிழ்நாட்டில் கொரோனா தடுப்பு நடவடிக்கைகள் தொடர்பாக முதல்வர் மு.க.ஸ்டாலின் தலைமையில் இன்று ஆலோசைக்கூட்டம் நடைபெற்றது. இதில், தனியார் மருத்துவமனைகளில் ரெம்டெசிவிர் மருந்து விற்பனை செய்ய முடிவு செய்யப்பட்டுள்ளது. எனவே நோயாளிகளின் குடும்பத்தினருக்கு இந்த மருந்தை வாங்குவதற்கான சீட்டை அளித்து, அவர்களை வாங்கிடப் பணிக்கும் செயல்கள் தவிர்க்கப்பட வேண்டுமென்றும் அரசின் செய்தி குறிப்பு அறிவுறுத்தியுள்ளது.

இப்போது பரவி வரும் கொலைகார கொரோனா வைரஸால் பாதிக்கப்பட்டு ஹாஸ்பிட்டல்களில் அட்மிட் ஆன பேஷண்டுகளுக்கு முதல் சிகிச்சையாக ரெம்டெவிசிர் மருந்தை டாக்டர்கள் பிரிஸ்கிரிப்சன் சீட்டில் எழுதிக் கொடுத்து அனுப்பி வருவதால் நோயாளிகளின் உறவினர்கள் ரெம்டெவிசிர் மருந்துக்காக அலைகின்றனர். குறிப்பாக சென்னை நேரு ஸ்டேடியத்தில் ரெம்டெவிசிர் மருந்தை வாங்குவதற்கு கூட்டம் அலைமோதி வரும் சூழலில் தனியார் ஊடகம் ஒன்றுக்கு பேட்டி அளித்த உலக சுகாதார அமைப்பின் தலைமை விஞ்ஞானி செளமியா சுவாமிநாதன் அவர்கள் தற்போதைய சூழலில் ரெம்டெவிசிர் மருந்தால் எந்தவித பயனும் இல்லை என்றும், இது கொரோனா சிகிச்சைக்கு பயன்படுமே தவிர குணப்படுத்தாது என்றும் தெரிவித்துள்ளார் அத்துடன் இந்த ரெம்டெவிசிர் மருந்தால் மருத்துவமனையில் தங்கும் குறையும் என்றும் அதிக மருத்துவ செலவால் அமெரிக்காவில் இது பொருந்துமே தவிர இந்தியாவில் பலனில்லை என்றும் அவர் தெரிவித்துள்ளார். உலக சுகாதார அமைப்பின் தலைமை விஞ்ஞானியின் இந்த கருத்து பெரும் பரபரப்பை ஏற்படுத்தியுள்ளது

இது குறித்து மேலும் சில தரவுகளை அலசிய போது ரெம்டெசிவிர் கொரோனாவுக்குப் பலனளிக்கிறதா என்பது குறித்து உலகின் பல நாடுகளில் செய்யப்பட்ட சோதனைகளில் சாதகமான முடிவுகள் கொஞ்சம் கூட இல்லை என்றே தெரிய வருகிறது. இந்த ரெம்டெசிவர் மருந்தைக் கொடுப்பதால் இறப்பு குறையவில்லை. குணமடையும் விகிதம் கூட மாறவில்லை. அதனால்தான், அரசு மருத்துவமனைகளில் இந்த மருந்து கொடுக்கப்படுவதில்லை. ஆனால், தனியார் மருத்துமனைகள் இப்போதும் இந்த மருந்தை பரிந்துரைக்கின்றன என்று சிலர் ஓப்பனாகச் சொல்கிறார்கள். கொஞ்சம் அதிர்ச்சியூட்டும் இத்தகவலுடன் ‘ஆரம்ப கட்டத்தில் இந்த மருந்தைக் கொடுத்தால், ஏதோ பலன் இருக்கலாம். கூடவே மருத்துவமனையில் இருக்கும் நாட்களை இது குறைக்கும். ஆனால், தீவிர நிலையில் இருக்கும் நோயாளிகளுக்கு ரெம்டெசிவர் மருந்தை கொடுப்பதாலோ, கொடுக்காமல் இருப்பதாலோ எவ்வித மாற்றமும் இருக்காது என்றார்கள்.

இது ஒருபுறமிருந்தாலும் தமிழகத்தில் கொரோனா வைரஸ் இரண்டாம் அலை நாளுக்கு நாள் தீவிரமடைந்து வருகிறது. தினசரி தொற்று பாதிப்புகள் அதிகரித்து வரும் நிலையில், தற்போது உயிரிழப்புகளும் அதிகரித்து காணப்படுகிறது. தமிழகம் முழுவதும் மருத்துவமனைகளில் படுக்கைகள், ஆக்சிஜன் தட்டுப்பாடு ஏற்பட்டுள்ளது. இதேபோல், கொரோனா வைரஸ் தொற்றால் கடுமையாக பாதிக்கப்பட்ட நோயாளிகளுக்கு ரெம்டெசிவிர் மருந்து கிடைப்பதிலும் சிக்கல் ஏற்பட்டது. தொடர்ந்து, ரெம்டெசிவிர் மருந்து கள்ளச்சந்தையில் விற்கப்படுவதாக குற்றச்சாட்டு எழுந்தது. இதனைத் தடுக்க தமிழ்நாடு மருத்துவ பணிகள் கழகத்தின் சார்பில் சென்னை கீழ்ப்பாக்கம் அரசு மருத்துவமனையில் ரெம்டெசிவிர் மருந்து விற்பனை கடந்த மாதம் 26ம் தேதி தொடங்கப்பட்டது.

பொதுமக்களின் கூட்டம் அதிகரித்ததால், சில தினங்களில் மருந்து விற்பனை அருகில் உள்ள கீழ்ப்பாக்கம் அரசு மருத்துவக் கல்லூரிக்கு மாற்றப்பட்டது. மேலும் மதுரை, திருச்சி, கோவை, சேலம், திருநெல்வேலி மாவட்டங்களிலும் மருந்து விற்பனை தொடங்கப்பட்டது. கீழ்ப்பாக்கம் அரசு மருத்துவக் கல்லூரியில் பொதுமக்களின் கூட்டம் குறையாததால், மருந்து விற்பனை நேரு உள்விளையாட்டு அரங்கத்துக்கு மாற்றப்பட்டது. நேற்றைய தினம் நேரு அரங்கத்திலும் ஆயிரக்கணக்கில் மக்கள் கூட்டம் அலைமோதியது.

இந்நிலையில், தமிழகத்தில் கொரோனா தடுப்பு நடவடிக்கைகள் தொடர்பாக முதல்வர் மு.க.ஸ்டாலின் தலைமையில் இன்று ஆலோசைக்கூட்டம் நடைபெற்றது. இதில், தனியார் மருத்துவமனைகளில் ரெம்டெசிவிர் மருந்து விற்பனை செய்ய முடிவு செய்யப்பட்டுள்ளது.

இது குறித்து தமிழக அரசு வெளியிட்ட செய்தி குறிப்பில், “முதல்வர் மு.க.ஸ்டாலின் தமிழகத்தில் உள்ள தனியார் மருத்துவமனைகளில் சிகிச்சை பெறும் நோயாளிகளுக்கு ரெம்டெசிவிர் மருந்து வழங்கும் முறையை மேம்படுத்துவது குறித்து ஆய்வு மேற்கொண்டார். தற்போது அரசு மருத்துவமனைகளில் உள்ள நோயாளிகளுக்கு ரெம்டெசிவிர் மருந்து தமிழக மருத்துவ சேவைக் கழகம் மூலமாக போதிய அளவில் வழங்கப்பட்டு வருகிறது. இந்நிலையில், ரெம்டெசிவிர் மருந்து விற்பனை செய்யப்படும் இடங்களில், அதிக கூட்டம் கூடுவதால், நோய் தொற்று பரவும் அபாயம் ஏற்படுவதால், அதனை தவிர்க்க வேண்டியுள்ளது.

https://www.facebook.com/AanthaiReporter/posts/3998492213579155

இதனால், பொது மக்களின் சிரமத்தைக் குறைக்கும் வகையிலும், தற்போதுள்ள முறையை மாற்றி, மருத்துவமனைகள் மூலமாக மட்டுமே இந்த மருந்தை வழங்கிட வேண்டுமென்று முதல்வர் ஸ்டாலின் அறிவுறுத்தினார். மேலும், நோயாளிகளின் குடும்பத்தினருக்கு இந்த மருந்தை வாங்குவதற்கான சீட்டை அளித்து, அவர்களை வாங்கிடப் பணிக்கும் செயல்கள் தவிர்க்கப்பட வேண்டுமென்றும் வலியுறுத்தினார்.

இதன்படி, வரும் மே 18ம் தேதி முதல் தமிழகத்தில் உள்ள அனைத்து தனியார் மருத்துவமனைகளும், தமது மருத்துவமனைகளில் ஆக்சிஜன் சிகிச்சை பெற்று வரும் நோயாளிகள் குறித்த விவரங்களோடு, மருந்து தேவை குறித்த தமது கோரிக்கைகளை இணையதளத்தில் பதிவிடும் வசதி ஏற்படுத்தப்படும். இந்த கோரிக்கைகளை பரிசீலித்து இந்த மருந்து ஒதுக்கீடு செய்யப்பட்டபின், அந்த மருத்துவமனையின் பிரதிநிதிகள் மட்டும், அவர்களுக்கான விற்பனை மையங்களுக்கு சென்று ஒதுக்கீடு செய்யப்படும் மருந்துகளை பெற்றுக் கொள்ளலாம். இதற்கான இணையதளம் குறித்த விவரங்கள் விரைவில் வெளியிடப்படும்.

இவ்வாறு வழங்கப்படும் மருந்துகள் தகுதியான நோயாளிகளுக்கு மட்டுமே பயன்படுத்தப்படுவதையும், பெறப்படும் அதே விலையிலேயே நோயாளிகளுக்கு அவை விற்பனை செய்யப்படுவதையும், தவறான முறையில் கள்ளச் சந்தையில் இவை விற்பனை செய்யப்படாதவாறும் சுகாதாரத்துறை அலுவலற்கள் தொடர்ந்து கண்காணிப்பார்கள். நோயாளிகளுக்கு தேவையற்ற முறையில் மருந்துச் சீட்டு அளிக்கும் மருத்துவனைகள் மீதும், மேற்கூறிய விதிமுறைகளை மீறுவோர் மீதும், சட்டப்படியான நடவடிக்கைகளை சுகாதாரத்துறை மேற்கொள்ளும்”என்று அதில் கூறப்பட்டுள்ளது.