June 24, 2021

தமிழகம் முழுவதும் இன்று முழு அடப்பு போராட்டம்!

 விவசாயிகளின் தற்கொலையைத் தடுக்க நடவடிக்கை வேண்டும். காவிரி மேலாண்மை வாரியம் அமைக்க வேண்டும், தமிழக விவசாயிகளின் கடனை தள்ளுபடி செய்ய வேண்டும். விவசாயிகளுக்கு வறட்சி நிவாரணம் வழங்க வேண்டும் என்பன உள்ளிட்ட பல்வேறு கோரிக்கைகளை வலியுறுத்தி தமிழக விவசாயிகள் டெல்லியில் தொடர் போராட்டத்தில் ஈடுபட்டனர். சுமார் 41 நாட்களாக நடைபெற்ற போராட்டம், நேற்று முன் தினம் தற்காலிக வாபஸ் பெறப்பட்டது. இதனிடையே, திமுக சார்பில் அனைத்துக் கட்சிக் கூட்டம் கூட்டப்பட்டது. அதில், விவசாயிகளின் கோரிக்கைகளை வலியுறுத்தி அவர்களுக்கு ஆதரவாக முழு அடைப்பு போராட்டம் நடத்துவது என முடிவு செய்யப்பட்டது. அதனடிப்படையில், மாநிலம் முழுவதும் இன்று முழு அடைப்பு போராட்டம் நடைபெறவுள்ளது.

tn apr 25

திமுக, காங்கிரஸ், கம்யூனிஸ்ட், விடுதலை சிறுத்தைகள் உள்ளிட்ட பல்வேறு அரசியல் கட்சிகள் இன்றைய முழு அடைப்பு போராட்டத்தில் பங்கேற்கவுள்ளன. அதேசமயம், அதிமுக, பாஜக, தமாகா, தேமுதிக, பாமக உள்ளிட்ட சில கட்சிகள் பங்கேற்கவில்லை.

இந்த போராட்டத்தில், ஆளுங்கட்சியான அதிமுக, பாஜக தவிர்த்து அனைத்துத் தரப்பினரும் பங்கேற்க வேண்டும் என எதிர்க்கட்சித் தலைவரும், திமுக செயல் தலைவருமான ஸ்டாலின் அழைப்பு விடுத்துள்ளார். எந்த தூண்டுதலுக்கும் இடம் கொடுத்து விடாமல், அமைதி வழியில் போராட்டம் நடத்தப்பட வேண்டும் எனவும் ஸ்டாலின் வேண்டுகோள் விடுத்துள்ளார்.

அனைத்துக் கட்சிகளின் அழைப்பை ஏற்று, இந்த போராட்டத்துக்கு வணிகர் சங்கம் ஆதரவு தெரிவித்துள்ளது. இதனால், வியாபாரிகள் கடைகளை அடைத்து முழு அடைப்பில் கலந்து கொள்ளவுள்ளனர். பல்வேறு அரசியல் கட்சிகள், அமைப்புகள், சங்கங்கள், தொழிற்சங்கங்கள் என பல தரப்பிலும் இருந்து முழு அடைப்பு போராட்டத்துக்கு ஆதரவு தெரிவித்துள்ளதால், அத்தியாவசிய பொருட்களின் சேவை முடங்கும் அபாயம் ஏற்பட்டுள்ளது. ஆனால், அத்தியாவசிய சேவைகள் முடங்காத வண்ணம், அந்தந்த துறையை சேர்ந்த அமைச்சகங்கள் நடவடிக்கை எடுத்துள்ளதாக தெரிகிறது.

சுமார் 10-க்கும் மேற்பட்ட போக்குவரத்து தொழிற்சங்கங்கள் அதரவு தெரிவித்து, ஒரு லட்சம் போக்குவரத்து ஊழியர்கள் போராட்டத்தில் பங்கேற்பார்கள் என தெரிவித்துள்ளன. தொழிற்சங்கங்களைச் சேர்ந்த ஆட்டோ, சரக்கு வாகனங்களும் இயங்காது என்று தெரிவிக்கப்பட்டுள்ளது. இதனால், போக்குவரத்து சேவை பாதிப்படையும் சூழல் ஏற்பட்டுள்ளது. ஆனாலும், அரசுப் பேருந்துகள் வழக்கம்போல் இயங்கும் என போக்குவரத்து அமைச்சர் விஜயபாஸ்கர் அறிவித்துள்ளார். மேலும், போலீஸ் பாதுகாப்புடன் பேருந்துகளை இயக்கவும் வழிவகை செய்யப்பட்டுள்ளது.

போராட்டத்துக்கு ஆதரவு தெரிவித்து நாளைய போராட்டத்தில் தமிழ்நாடு ஓட்டல்கள் சங்கம் பங்கேற்கிறது. இதனால், காலை முதல் மாலைவரை உணவகங்கள் இயங்காது. திரையுலகமும் முழு அடைப்பில் பங்கேற்பதால், திரையரங்குகளில் பகல் காட்சிகள் ரத்து செய்யப்பட்டுள்ளன. படப்பிடிப்புகளும் ரத்து செய்யப்பட்டுள்ளன.

இந்த போராட்டத்துக்கு ஆதரவில்லை என தமிழக அரசு அறிவித்துள்ள நிலையில், பொதுமக்களின் பாதுகாப்புக்காக, மாநிலம் முழுவதும் சுமார் ஒரு லட்சம் போலீசாருக்கு மேல் பாதுகாப்பு பணியில் ஈடுபடுத்தப்படவுள்ளனர் எனவும், சென்னையில் மட்டும் 15 ஆயிரம் போலீசாருக்கு மேல் பாதுகாப்பு பணியில் ஈடுபடவுள்ளனர் எனவும் தெரிவிக்கப்பட்டுள்ளது.