April 14, 2021

அறிவாலயத்தில் பாட்டாளி முன்னேற்ற கட்சித் தலைவர்!

வன்னியர் கூட்டமைப்பின் தலைவரும், அனைத்திந்திய பாட்டாளி முன்னேற்ற கட்சித் தலைவர் சி.என்.இராமமூர்த்தி சென்னை அண்ணா அறிவாலயத்தில் திமுக தலைவர் மு.க.ஸ்டாலினை சந்தித்து பேசினார்.

தமிழகத்தில் தேர்தல் பரபரப்பு நாளுக்கு நாள் அதிகரித்து வரும் நிலையில் பாமக நிறுவனர் ராமதாசுக்கு நேர் எதிர் கருத்து பேசிவரும் சி.என்.இராமமூர்த்தி திடீரென திமுக தலைவர் ஸ்டாலினை சந்தித்தது தமிழக அரசியல் வட்டாரத்தில் குறிப்பாக பாமக தரப்பில் பெரும் பரபரப்பை ஏற்படுத்தி உள்ளது.

காரணம் பாமக இப்போது ஆளும் அதிமுக கூட்டணியில் இருந்தாலும் சட்டசபை தேர்தலில் திமுகவுடனும் ரகசிய பேச்சுவார்த்தை நடத்த திட்டமிட்டது. ஆனால் வர இருக்கும் ஆட்சியில் பங்கு, அதிகமான சட்டமன்றத் தொகுதிகள் உள்ளிட்ட கடுமையான நிபந்தனைகளை பாமக விதிப்பதாலும், அந்தக் கட்சியுடன் கூட்டணி சேர்ந்தால் திமுக கூட்டணியை விட்டு வெளியேறுவேன் என்று திருமாவளவன் மிரட்டுவதாலும், பாமகவுடன் கூட்டணி சேர வேண்டாம் என்று திமுக முடிவெடுத்துள்ளது. ஆனால், பாமகவுக்கு எதிரான பல வன்னியர் குழுக்களைத் தனது அணிக்கு ஆதரவாக இணைத்து வன்னியர் வாக்குகளைப் பெறலாம் என்று திமுக திட்டமிட்டுள்ள சூழலில் சி.என்.இராமமூர்த்தி திமுக தலைவர் ஸ்டாலின் சந்திப்பு முக்கியத்துவம் வாய்ந்ததாக பார்க்கப்படுகிறது.

ஏற்கெனவே வன்னியர் சங்கத்தின் முன்னாள் தலைவரும், பாமக சட்டமன்ற உறுப்பினருமான காடுவெட்டி குருவின் மகன் கலையரசன் தலைமையில் இயங்கும் மஞ்சள்படை அமைப்பை தனது பக்கம் திமுக இழுத்துள்ளது. இந்த சூழலில் சி.என்.இராமமூர்த்தி திமுக தலைவர் ஸ்டாலின் சந்திப்பு முக்கியத்துவம் வாய்ந்ததாக பார்க்கப்படுகிறது.

இது குறித்து சி.என்.இராமமூர்த்தியிடம் கேட்டபோது, “மரியாதை நிமித்தமான சந்திப்பு” என்று மட்டும் தெரிவித்தார்.

இந்த சந்திப்பின் போது திமுக மூத்த தலைவர்கள் டி.ஆர்.பாலு, ஆ.ராசா, டி.கே.எஸ்.இளங்கோவன், ஆலந்தூர் பாரதி ஆகியோர் உடனிருந்தனர்