October 26, 2021

ஆந்திராவில் ஆன்லைன் ரம்மி & போக்கர் விளையாட்டுகளுக்குத் தடை..!

வயது பாகுபாடு இன்றி பல தரப்பினரையும் மனச் சிதைவுக்கு ஆளாக்கும் ஆன் லைன் ரம்மி மற்றும் போக்கர் போன்ற ஆன்லைன் விளையாட்டுகளை தடை செய்ய ஆந்திர அரசு முடிவு செய்துள்ளது. முதல்வர் ஒய்.எஸ்.ஜெகன் மோகன் ரெட்டியின் தலைமையில் கூடிய மாநில அமைச்சரவை இந்த தடை செய்யும் முடிவை எடுத்துள்ளது.

சூதாட்டங்களுக்கு பல பகுதிகளில் தடை விதிக்கப்பட்டிருந்தாலும், ஆன்லைனில் விளையாடப் படும் ரம்மி உள்ளிட்ட சூதாட்டங்களுக்கு தடை இல்லை. இதனால் பல இளைஞர்கள் பணத்திற்கு ஆசைப்பட்டு இதை விளையாண்டு பணத்தை இழந்து வருகின்றனர். பணத்தை இழப்பதோடு மட்டுமல்லாமல் நிறைய பேர் மன உளைச்சலுக்கு ஆளாகி உயிரையும் இழக்கும் சம்பவங்கள் தொடர்கதையாக உள்ளதால் நாடு முழுவதும் இதற்கு தடை விதிக்க வேண்டும் அவ்வப்போது குரல்கள் ஒலித்து வருகின்றன.முன்னதாக கடந்த 2017’இல் முதல்முறையாக தெலங்கானா அரசு பணம் கட்டி விளையாடும் அனைத்து விதமான ஆன்லைன் விளையாட்டு களுக்கு தடை விதித்தது. இந்நிலையில் தற்போது ஆந்திராவும் இந்த வரிசையில் இணைந்துள்ளது.

ஜெகன் மோகன் ரெட்டி தலைமையிலான ஆந்திராவின் அமைச்சரவைக் கூட்டத்தின் முடிவில் செய்தியாளர்களுக்கு விளக்கமளித்த தகவல் தொழில்நுட்ப அமைச்சர் பெர்னி வெங்கட் ராமையா, ஆன்லைன் சூதாட்டம் இளைஞர்களை தவறாக வழிநடத்துவதன் மூலம் அவர்களை சேதப்படுத்தும் ஒரு துணையாக மாறியுள்ளது என்றார். “எனவே இளைஞர்களைப் பாதுகாக்க இதுபோன்ற அனைத்து ஆன்லைன் சூதாட்டங்களையும் தடை செய்ய முடிவு செய்துள்ளோம்” என்று மேலும் கூறினார்.

“ஆன்லைன் சூதாட்ட விளையாட்டுகளின் அமைப்பாளர்கள் இரண்டாவது முறையாக பிடிபட்டால், அவர்களுக்கு 2 ஆண்டுகள் சிறைத்தண்டனையும் அபராதமும் விதிக்கப்படும். ஆன்லைன் சூதாட்ட விளையாட்டுகளை விளையாடுபவர்களுக்கு ஆறு மாத சிறைத்தண்டனை விதிக்கப்படும்” என்று அவர் மேலும் தெரிவித்தார்.

அமைச்சரவை முடிவின்படி, ஆன்லைன் சூதாட்டத்தின் அமைப்பாளர்கள் முதல் தடவையாக குற்றத்திற்காக அபராதம் விதிக்கப்படுவதைத் தவிர ஒரு வருடம் சிறையில் அடைக்கப் படுவார்கள். சிறைத்தண்டனை இரண்டாவது குற்றத்திற்கு இரண்டு ஆண்டுகள் வரை அபராதம் விதிக்கப்படும். மேலும், ஆன்லைனில் விளையாடுபவர்கள் பிடிபட்டால் ஆறு மாத சிறைத்தண்டனையை அனுபவிப்பார்கள் என்றும் அமைச்சர் மேலும் தெரிவித்தார்.