மேதகு 2 – விமர்சனம்!

மேதகு 2 – விமர்சனம்!

மேதகு திரைக்களம் தயாரிப்பில் இரா. கோ. யோகேந்திரனின் ஆக்கம் மற்றும் இயக்கத்தில் வெளியாகி இருக்கும் படம் மேதகு 2.

பிரபாகரனின் ஆரம்ப கால வரலாற்றைப் பதிவு செய்யும் விதமாக வந்த மேதகு பாகம் ஒன்றை கிட்டு இயக்கி இருந்தார். கடந்த ஆண்டு ஜூன் 25 அன்று பாகம் ஒன்று வெளியாகி பெரும் வரவேற்பைப் பெற்றது .இதன் தொடர்ச்சியாக இப்போது மேதகு 2 வெளியாகி இருக்கிறது. இதில் விடுதலைப் புலிகள் இயக்கத்தின் வளர்ச்சியும் தமிழக தலைவர்களின் உதவியும் இந்திரா காந்தியிடம் நடத்தப்பட்ட பேச்சுவார்த்தை உள்ளிட்டவை இடம் பெற்றுள்ளன. பாவலரேறு பெருஞ்சித்திரனார் , பழ . நெடுமாறன் , புதுக்கோட்டை பாவண்ணன், வைகோ ஆகியோர் புலிகள் இயக்கத்துக்கு அளித்த ஆதரவும் எம் ஜி ஆர் கோடிகளை அள்ளிக் கொடுத்த விதமும் சொல்லப்படுகிறது. மூன்றாம் பாகம் வரும் என்ற அறிவிப்போடு இந்த மேதகு 2 படம் முடிகிறது.

கதையின் நாயகனாக பிரபாகரன் கதாப்பாத்திரத்தில் நடித்துள்ள கெளரிசங்கர், கதாப்பாத்திரத்திற்கு பொருத்தமானவராக இருப்பதோடு அளவான நடிப்பு மூலம் கவனம் பெறுகிறார்.சிறப்பு தோற்றத்தில் நடித்திருக்கும் நாசரின் மெளனம் பல கேள்விகளை நம் மனதில் எழுப்புவதோடு, விடுதலைப் புலிகள் அமைப்பின் அமைதிக்கு பின்னணியில் மிகப்பெரிய சூறாவளி இருப்பதையும் உணர்த்துகிறது.

ஒளிப்பதிவாளர் வினோத் ராஜேந்திரன் இயல்பான ஒளிப்பதிவு கதையை தொந்தரவு செய்யாமல் பயணிக்கிறது. தமிழர்களின் போராட்டத்தின் வீரியத்தையும், தமிழர்களின் வலியையும் படம் பார்ப்பவர்கள் உணரும் வகையில் பிரவின் குமாரின் பின்னணி இசை பயணிக்கிறது.

இலங்கை மண்ணில் தமிழர்களின் உரிமையை மீட்பதற்காக உருவாக்கப்பட்ட விடுதலைப் புலிகள் அமைப்பின் வளர்ச்சி, கட்டமைப்பு, ஆயுத பலம், அவர்களின் தாக்குதல் மற்றும் உலக நாடுகளின் அரசியல் தந்திரங்களை முறியடித்தல் என பல வரலாற்று சம்பவங்களை காட்சிகள் மூலம் நம் கண் முன் நிறுத்திய இயக்குநரை நிச்சயம் பாராட்டியாக வேண்டும். அதே சமயம், சர்வதேச அளவில் புகழ் பெற்ற பிரபாகரன் மற்றும் அவர் தொடர்பான அரசியல் நிகழ்வுகளை  மிக சாதாரணமான முறையில் படமாக்கியிருப்பது மிகப்பெரிய பலவீனமாக உள்ளது.

ஒவ்வொரு சம்பவங்களின் பின்னணியில் மிகப்பெரிய அரசியல் மறைந்திருப்பதை இயக்குநர் மற்றும் கதை எழுதிய குழுவினர் இன்னும் விரிவாகவும், வீரியமாகவும் காட்டியிருந்தால் ‘மேதகு 2’ பல உயரங்களை தொட்டிருக்கும்.

மேதகு 2 பார்க்க வேண்டிய படம்.

இந்த படம் வெளிநாட்டு திரையரங்குகளிலும் tamils OTT என்கிற புதிய ஓடிடி தளத்திலும் இப்படம் வெளியாகி உள்ளது.

error: Content is protected !!