December 1, 2021

நான் ஒன்றிய அரசு என்ற சொல்லையே பயன்படுத்தவில்லை! -புதுச்சேரி கவர்னர் விளக்கம்!

புதுச்சேரி பதவிப் பிரமாண நிகழ்ச்சியின்போது அமைச்சர்களுக்குப் பதவிப் பிரமாணம் செய்துவைத்த துணைநிலை ஆளுநர் தமிழிசை செளந்தரராஜன், “இந்திய ஒன்றியத்திற்கு உட்பட்ட புதுச்சேரி ஆட்சிப் பரப்பு” என உறுதிமொழியை வாசித்தார். அண்மையில் தமிழ்நாட்டில் திமுக தலைமையிலான ஆட்சி அமைந்ததில் இருந்து ‘மத்திய அரசு’ என்று அழைப்பதற்குப் பதிலாக முதலமைச்சர் மு.க. ஸ்டாலின் தலைமையிலான அமைச்சர்கள், எம்.எல்.ஏக்கள், பிற கட்சியினர் ஆகியோர் ‘இந்திய ஒன்றிய அரசு’ என்று பயன்படுத்துகின்றனர். அதற்கு பாஜகவினர் கடுமையாக எதிர்ப்பு தெரிவித்து வரும். இந்த நிலையில் பாஜக கூட்டணி அரசு அமையும் புதுச்சேரியின் துணைநிலை ஆளுநர் ‘இந்திய ஒன்றியம்’ என அழைத்தது சர்ச்சையை ஏற்படுத்தியுள்ளது.

இதை அடுத்து புதுச்சேரி துணைநிலை ஆளுநர் தமிழிசை சவுந்தரராஜன் வெளியிட்டுள்ள செய்திக்குறிப்பு இதோ:

புதுச்சேரி புதிய அமைச்சர்களுக்கு நேற்று முன்தினம் தமிழில் பதவிப்பிரமாணமும், ரகசிய காப்புப் பிரமாணமும் செய்து வைத்தேன். அத்தகைய பெருமைமிகு நிகழ்வில் அரசியலமைப்பு சட்டத்தின்படி, பல ஆண்டு காலமாக புதுச்சேரி அரசால் மரபாக பயன்படுத்தப்பட்ட தமிழ் உறுதிமொழி படிவத்தில் எந்த மாறுதலும் இல்லாமல் தமிழில் பதவிப்பிரமாணம் செய்து வைக்கப்பட்டது.

இந்த பெருமையை மறைக்கும் அளவிற்கு “இந்திய ஒன்றியம்” என்ற வார்த்தை வேண்டுமென்றே திரித்து கூறப்பட்டு வருகிறது. ஒன்றிய அரசு என்ற சொல் எங்கும் பயன்படுத்தவில்லை. ஆனால் ஒன்றிய அரசு என்று துணை நிலை ஆளுநர் கூறியதாக பொத்தாம்பொதுவாக கருத்து தெரிவிக்கப்படுகிறது.

எவ்வாறு தமிழக அமைச்சர்கள் பதவியேற்கும்போது தமிழக அமைச்சர்களாக பதவியேற்கிறோம் என்று கூறினார்களோ, அதேபோல் “Indian Union Territory of Puducherry’’ என்ற வாசகம் இந்திய ஒன்றிய புதுச்சேரி ஆட்சிப்பரப்பு என மிக அழகாக வெகுகாலத்திற்கு முன்பே புதுச்சேரி தமிழறிஞர்களால் மொழி பெயர்க்கப்பட்டு சட்டமாக்கப்பட்டது. இந்த படிவம் தான் வெகுகாலமாக தொடர்ந்து பயன்படுத்தப்பட்டு வருகிறது. பிரெஞ்சு ஆதிக்கத்தில் இருந்து அதன் பின்பு இந்திய ஆட்சிக்கு உட்பட்டதால் அதை “Indian Union Territory” என்கிறார்கள்.

அதாவது “இந்திய ஒன்றிய ஆட்சிப்பரப்பு “. அதனால் தான் ஒன்றியம் என குறிப்பிடுவது Union Territory என்ற யூனியன் பிரதேசமான புதுச்சேரியை தான். இங்கு எங்கேயும் மத்திய அரசு என்று குறிப்பிடப்படவில்லை. அதனால் மத்திய அரசை ஒன்றிய அரசு என்று கூறியதாக திரித்துக்கூறுவது கண்டிக்கத்தக்கது. புதுச்சேரி இந்திய அரசின் ஆளுமைக்குட்பட்டு இருக்கும் நிலப்பரப்பு. அதனால் இந்திய ஒன்றிய புதுச்சேரி நிலப்பரப்பு என்று சொல்கிறோம்.

இந்திய தேசத்திற்கான மத்திய அமைச்சரவை பதவியேற்பு விழா அங்கே நடைபெறவில்லை. ஆக மாநில அரசுகளின் பதவியேற்பு விழா படிவத்தில் மத்திய அரசு என்ற வார்த்தை இடம் பெறாது. அவ்வாறு இருக்கையில் புதுச்சேரியில் மட்டும் ஒன்றிய அரசு என்று சொல்லப்பட்டது என்று சொல்வது உள்நோக்கம் கொண்டது.

ஆகவே தான் இந்த விளக்கம் தேவைப்படுகிறது. தமிழ் மண்ணில் தமிழில் பதவியேற்ற பெருமையை நிலைநிறுத்த வேண்டும். ஆனால் அதன் மாண்பை மறைக்கும் அளவிற்கு தவறாக இந்திய ஒன்றியம் என்ற கருத்து பரப்பப்பட்டு வருகிறது. எனவே சில தேவையற்ற சலசலப்புகளால் பலரது தியாகத்தால் உருவான பலமான இந்திய இறையாண்மையை குலைக்க முயல வேண்டாம் என்று கேட்டுக்கொள்கிறேன்.” இவ்வாறு தனது அறிக்கையில் தெரிவித்துள்ளார்.