June 24, 2021

21 வயதில் நீதிபதியாகப் போகும் ஜெய்ப்பூர் இளைஞர்!

சட்டம் என்பது ஒரு பெருங்கடல். வரி விதிப்பு, கிரிமினல் வழக்குகள், சிவில் வழக்குகள், அறிவுசார் சொத்துரிமை தொடர்பான வழக்குகள், மான நஷ்டஈடு வழக்குகள், விவாகரத்து வழக்குகள், குடும்ப வன்முறை வழக்குகள், சர்வதேச சட்டம் தொடர்பான வழக்குகள், பணி தொடர்பான வழக்குகள் (Service matters), தொழிலாளர் பிரச்சினைகள் தொடர்பான வழக்குகள், என்று பல்வேறு பிரிவுகள் உள்ளன. இதில் ஒவ்வொரு பிரிவும் ஒரு குட்டிக் கடல். இதில் ஏதாவது ஒரு கடலில் மூழ்கி முத்தெ டுப்பது எளிதான காரியம் அல்ல. இப்படி பல்வேறு பிரிவுகள் இருக்கையில், ஒரு நீதிபதி, எல்லா பிரிவுகளிலும், பரிச்சயம் மட்டுமல்ல, ஓரளவு தேர்ச்சியும் அடைந்திருக்க வேண்டும் என்று எதிர்ப்பார்க்கப்படுகிறது. ஏனென்றால், ஒருவர் உயர்நீதிமன்ற நீதிபதி ஆன பிறகு, எனக்கு இந்தப் பிரிவு சட்டம் குறித்துதான் நன்றாகத் தெரியும்… மற்ற பிரிவுகள் குறித்துத் தெரியாது என்று சொல்ல முடியாது. அப்படிப்பட்ட நபர்கள் நீதிபதிகளானால்தான் வழக்கு விபரங்களை எளிதாகப் புரிந்து கொண்டு விரைவாகத் தீர்ப்பு வழங்க முடியும் என்று எதிர்ப்பார்க்கப்படுகிறது. இந்நிலையில்  ராஜஸ்தான் மாநில நீதித்துறை பணியில் இந்தியாவின் மிக குறைந்த வயதான 21 வயதில் நீதிபதி பொறுப்பை ஏற்பவர் எனும் பெருமையை ஜெய்ப்பூரைச் சேர்ந்த மயங்க் பிரதாப் சிங் என்ற இளைஞர் பெறவுள்ளார்.

ராஜஸ்தான் மாநிலம், ஜெய்ப்பூரின் மானசரோவர் பகுதியைச் சேர்ந்தவர் மயங்க் பிரதாப் சிங்(21). இவர், ராஜஸ்தான் பல்கலைக்கழகத்தில் தனது ஐந்தாண்டு சட்டப்படிப்பான எல்.எல்.பி படிப்பை கடந்த ஏப்ரல் மாதம் பூர்த்தி செய்தார். ராஜஸ்தான் உயர்நீதிமன்றம் நீதித்துறை சேவைகள் தேர்வில் கலந்து கொள்வதற்கான குறைந்தபட்ச வயதுவரம்பை 23- இல் இருந்து 21-ஆக குறைத்தது.

இதையடுத்து 2018 ஆம் ஆண்டுக்கான ராஜஸ்தான் நீதித்துறை சேவைகள் தேர்வின் நீதிபதிகளுக் கான தகுதி தேர்வில் கலந்துகொண்ட மயங்க் பிரதாப், தனது முதல் முயற்சியிலேயே தேர்ச்சி பெற்றார்.  இதையடுத்து விரைவில் பதவியேற்க உள்ளார். இதன் மூலம் இந்தியாவிலேயே மிக இள வயதில் நீதிபதியான இளைஞர் என்ற சிறப்பை மயங்க் பிரதாப் சிங் பெறவுள்ளார்.

இது குறித்து, மயங்க் பிரதாப் சிங் செய்தியாளர்களுக்கு அளித்த பேட்டியில், ஒரு நல்ல நீதிபதியாக செயல்படுவதற்காக, ராஜஸ்தான் நீதித்துறை சேவைகள் 2018 தேர்வில் தேர்ச்சி பெறுவதற்காக ஒவ்வொரு நாளும் 12 முதல் 13 மணி நேரம் தொடர்ந்து படித்து வந்ததாகவும், என் பெற்றோரும் எனக்கு உதவியாக இருந்தனர்.

ஒரு நல்ல நீதிபதியாக பணியாற்றுவோருக்கு நேர்மை தான் மிகவும் முக்கியம். வெளியில் இருந்து வரும் எந்த சக்திகளுக்கு எளிதில் ஆளாகாமல், ஆள் பலம், பண பலத்துக்கு ஆசைப்படாமல் நேர்மையாக பணியாற்ற வேண்டும் என்பதே என் விருப்பம் என கூறினார்.