’பூமராங்’ படத்தை கண்டிப்பா பார்ப்பேன் என்று சொன்னார் ரஜினி – கண்ணன் நெகிழ்ச்சி

ரஜினி – எப்போதும் ஆழமும், அழுத்தமும், யதார்த்தமுமாக பேசி செயல்படுவர். தன் போக்கு குறித்து முன்னொரு முறை  ‘நான் அரசியலில் இறங்குவேனா என்பது எனக்கு உண்மையிலேயே தெரியாது. நான் எதையும் தொலை நோக்குடன் பார்க்க மாட்டேன். காவிரி தவிர அரசியல் ஆதரவு திரட்டுவது என்றால், வறுமை ஒழிப்புக்கு முழக்கம் இடுவேன். ‘வெள்ளையனே வெளியேறு இயக்கம்’ போல இதை மேற்கொள்வேன். ஆனால் இப்போதைக்கு, இன்றைய பிரச்சனையைத்தான் பார்ப்பேன். நாளைய விவகாரத்தை நாளை பார்க்கலாம். எனக்கு கிடைத்த எவையும் நான் தேடியதே இல்லை. எனக்கு விதியில் நம்பிக்கை உண்டு” என்று குறிப்பிட்டிருந்த நடிகர் ரஜினிகாந்த் அரசியலில் நுழைவதாக அறிவித்து ஒரு வருடத்திற்கு மேல் ஆகும் நிலையில் கட்சிக்கான முதற்கட்ட பணிகள் மட்டும் தற்போது நடந்து வருகிறது.

இந்நிலையில் நாளை உலகமெங்கும் வெளியாகவுள்ள பூமராங் படம் விவசாயத்தின் மேன்மை பற்றியும், எதிர்கால நீர்த் தேவைக்கான நதிநீர் இணைப்பின் அவசியம் பற்றியும் ஆய்வு பூர்வமாகப் பேசுகிறது. இந்த செய்திகள் பத்திரிகை களில் பரவலான வெளியான நிலையில் நதிநீர் இணைப்பை பல்லாண்டுகளாக வலுயுறுத்தி வரும் சூப்பர்ஸ்டார் ரஜினியின் கண்களுக்கும், செவிகளுக்கும் இந்த செய்தி போனது. உடனே  பூமராங் இயக்குநர் ஆர்.கண்ணனை தன் இல்லத்துக்கு அழைத்துப் பாராட்டி இருக்கிறார் ரஜினி. இந்த சந்திப்பில் நெகிழ்ந்து போயிருக்கிறார் கண்ணன்.

அது பற்றிக் கேட்டபோது,  “ரஜினி சாரிடமிருந்து அழைப்பு வந்ததும் ஆடிப் போனேன். நேரில் அவரைப் பார்த்ததும் நெகிழ்ந்தேன். படத்தில் நதி நீர் இணைப்புக்காக நாங்கள் செய்த ஆய்வைச்சொல்லி இது எப்படி சாத்தியப்படும் என்பதையும் எடுத்துச் சொன்னேன்.

அரை மணிநேரம் பொறுமையாகவும், ஆழமாகவும் கேட்ட ரஜினி படத்தில் இடம்பெறும் நதிநீர் இணைப்பு பாடலை யும், டிரைலரையும் பார்த்துவிட்டு “எக்சலண்ட்…” என்றார். பல்லாயிரம் கோடி பாராட்டுகளைப் பெற்ற அவரிடமிருந்து எங்களுக்கு ஒரு பாராட்டு கிடைத்ததும் அது பல கோடி பாராட்டுகளுக்கு சமம் என்று நெகிழ்ந்தேன்.

நான் கிளம்பும்போது “கண்டிப்பாக பூமராங் படத்தைப் பார்க்கிறேன்..!” என்றார் அவர் அன்புடன். இதுவே எங்கள் டீமுக்குக் கிடைத்த முதல் வெற்றி..!” உற்சாகமாக சொல்லி முடித்தார் கண்ணன்.

‘மசாலா பிக்ஸ்’ சார்பாக இயக்குநர் ஆர்.கண்ணன் தயாரித்து இயக்கியிருக்கும் ‘பூமராங்’ படத்தில் அதர்வா முரளி, மேகா ஆகாஷ், ஆர்ஜே பாலாஜி, சதீஷ், இந்துஜா உள்ளிட்டோர் நடித்திருக்கிறார்கள். ரதன் இப்படத்துக்கு இசையமைத்திருக்கிறார்.