ஷாம்பூ, சாக்லேட்.பிஸ்கட், மசாலா பொருட்கள் அடைத்து வைக்கப்படும் பிளாஸ்டிக் கவர்களுக்கும் தடை? – தமிழக அரசு முடிவு – AanthaiReporter.Com

ஷாம்பூ, சாக்லேட்.பிஸ்கட், மசாலா பொருட்கள் அடைத்து வைக்கப்படும் பிளாஸ்டிக் கவர்களுக்கும் தடை? – தமிழக அரசு முடிவு

பல்வேறு  வணிகர்கள், உணவு விடுதிகள், மக்கள் என சென்னையில் எந்த மூலையில் பார்த்தாலும் அனைத்து தரப்பினரும் படிப்படியாக சுற்றுச்சூழலுக்கு உகந்த பொருட்களுக்கு மாறத் தொடங்கி விட்ட  நிலையில் பிஸ்கட், ஷாம்பூ, பானங்கள் போன்றவற்றிற்கு பயன்படுத்தப்படும் பிளாஸ்டிக் கவர்களுக்கு தடை விதிக்க தமிழக அரசு நடவடிக்கை எடுத்துள்ளது.

ஜனவரி 1ஆம் தேதி முதல் தமிழகத்தில் பிளாஸ்டிக் பைகள் போன்ற ஒருமுறை மட்டும் பயன் படுத்தப்படும் பிளாஸ்டிக் பொருட்களுக்கு தடை விதிக்கப்பட்டுள்ளது. இதை அடுத்து மரத்திலான சமையல் உபகரணங்கள், பேப்பர் மற்றும் துணியிலான பைகள், ஸ்டீல் பாத்திரங்கள் ஆகியவை பிளாஸ்டிக்கு மாற்றாக வலம் வரத் தொடங்கிவிட்டன.

இதனிடையே ஓரிரு தினங்களுக்கு முன்பு மத்திய அரசு மாநிலங்களுக்கு ஒரு கடிதத்தை அனுப்பி உள்ளது. அக்கடிதத்தில், ஒருமுறை மட்டும் பயன்படுத்தப்படும் பிளாஸ்டிக் பொருட்களை கட்டுப் படுத்த நடவடிக்கை எடுக்கும்படி அறிவுறுத்தப்பட்டுள்ளது.

அதன் படி  தமிழகத்தில் பிஸ்கட்டுகள், கிரீம்கள், ஷாம்பூ போன்ற பொருட்களுக்கு பயன்படுத்தப் படும் பிளாஸ்டிக் கவர்களுக்கும் தடை விதிக்க தமிழக அரசு முடிவு செய்துள்ளது. இதற்காக 95 நிறுவனங்களுக்கு நோட்டீஸ் அனுப்பப்பட்டுள்ளது. அந்த நோட்டீஸில், ஒரு மாதத்திற்குள் பிளஸ்டிக் கழிவு மேலாண்மை விதிகளுக்கு இணங்க தமிழக மாசுக்கட்டுப்பாட்டு வாரியத்திடம் பதிவு செய்யாத வரையில், பிளாஸ்டிக் பொருட்களை பயன்படுத்தி பேக்கிங் செய்யப்பட்ட பொருட்களை சந்தைப்படுத்த முடியாது என்று தெரிவிக்கப்பட்டுள்ளது.

இந்த உத்தரவை தமிழக மாசுக்கட்டுப்பாட்டு வாரிய தலைவர் சம்பு கல்லோலிகர் வெளியிட்டு உள்ளார். இரண்டு மாநிலங்களுக்குள் மட்டும் தொழில் செய்தால் தமிழக மாசுக்கட்டுப்பாட்டு வாரியத்துடன் பதிவு செய்துகொள்ளும்படியும், இரண்டுக்கும் மேற்பட்ட மாநிலங்களில் தொழில் செய்தால் மத்திய மாசுக்கட்டுப்பாட்டு வாரியத்துடன் பதிவு செய்துகொள்ளும்படியும் இந்த உத்தரவில் தெரிவிக்கப்பட்டுள்ளது. பிளாஸ்டிக் கவர்கள் மட்டுமல்லாமல் பிளாஸ்டிக் பாட்டில்கள் பயன்படுத்தும் நிறுவனங்களுக்கும் இது பொருந்தும்.

நெஸ்லே இந்தியா, இந்துஸ்தான் யுனிலீவர் லிமிட்டெட், இந்துஸ்தான் – கொககோலா பிவரேஜஸ், டாபர் இந்தியா, பிகாஜி ஃபுட்ஸ், பிஸ்லெரி இண்டெர்நேஷனல், பிரிட்டானியா இண்டஸ்ட்ரீஸ், பெப்சிகோ இந்தியா, ரிலையன்ஸ் இண்டஸ்ட்ரீஸ், பிரிட்டானியா & கோ, சக்தி மசாலா, அமுல் டெய்ரி, எவரெஸ்ட் லிமிட்டெட், பார்லே, எம்.டி.ஆர் ஃபுட்ஸ், ஆவின், கேட்பரி இந்தியா உள்ளிட்ட நிறுவனங்களுக்கு இந்த நோட்டீஸ் அனுப்பப்பட்டுள்ளது குறிப்பிடத்தக்கது.