தங்கத்துக்கான வரி & சேதாரத்தை கட் பண்ணுங்கப்பூ! – ராமதாஸ் கோரிக்கை – AanthaiReporter.Com

தங்கத்துக்கான வரி & சேதாரத்தை கட் பண்ணுங்கப்பூ! – ராமதாஸ் கோரிக்கை

நாடு முழுவதும் நகரங்களில் தங்கத்துக்கு அன்றைய சந்தை விலை நிர்ணயிக்கப்பட்டாலும், ஆபர ணமாக வாங்கும்போது அத்துடன் செய்கூலி, சேதாரம் போன்றவற்றுக்கும் சேர்த்துதான் விலை கொடுக்க வேண்டும். இந்நிலையில் தங்கத்தின் மீது வரிகளையும், சேதத்தையும் திணிப்பது நியாயமல்ல. இது ஏழைகளின் இல்லத் திருமணத்திற்கு தடையாக இருக்கிறது. இது மாற்றப்பட வேண்டும் என்று பாமக நிறுவனர் ராமதாஸ் தெரிவித்துள்ளார்.

இது தொடர்பாக இன்று அவர் வெளியிட்ட அறிக்கையில், “தமிழ்நாடு உட்பட இந்தியா முழுவதும் தங்கம் விலை வரலாறு காணாத உச்சத்தைத் தொட்டிருக்கிறது. தங்கத்தின் விலை ஒரு பவுன் ரூ.32,576 என்ற அளவுக்கு உயர்ந்திருப்பதால் திருமணம் உள்ளிட்ட சுப காரியங்களை நடத்தவுள்ள ஏழை மற்றும் நடுத்தர மக்கள் கடும் இன்னலுக்கு ஆளாகியுள்ளனர். சென்னையில் நேற்று தங்கத்தின் விலை 1 கிராமுக்கு 60 ரூபாயும், ஒரு பவுனுக்கு 480 ரூபாயும் அதிகரித்து 1 கிராமின் விலை ரூ.4072 ஆகவும்,

ஒரு பவுனின் விலை ரூ.32,576 ஆகவும் உள்ளன. கடந்த 12-ம் தேதிக்குப் பிந்தைய 10 நாட்களில் மட்டும் ஒரு கிராமின் விலை 210 ரூபாயும், பவுனின் விலை 1680 ரூபாயும் உயர்ந்துள்ளன.

இந்திய வரலாற்றில் தங்க விலையின் உச்சம் இதுவாகும். தங்கம் விலை மின்னல் வேகத்தில் அதிகரித்திருப்பதும் இதுதான் முதல் முறை என்பது குறிப்பிடத்தக்கது.

கடந்த 2019-ம் ஆண்டின் குறைந்தபட்ச விலையான ஒரு கிராம் ரூ.2992, ஒரு பவுன் ரூ.23,936 என்ற அளவுடன் ஒப்பிடும்போது நடப்பாண்டில் ஒரு பவுன் தங்கத்தின் விலை ரூ.8,640 உயர்ந்துள்ளது.

சீனாவை வதைத்து வரும் கரோனா வைரஸ் காரணமாக உலக அளவில் தொழில் மற்றும் ஏற்று மதி துறையில் பெரும் பின்னடைவு ஏற்பட்டிருக்கிறது. அதனால் பங்குச் சந்தையில் நிச்சயமற்ற நிலை நிலவி வரும் சூழலில், முதலீட்டாளர்கள் பலரும் பாதுகாப்பான முதலீடான தங்கத்தை வாங்கிக் குவித்து வருவதுதான் இந்நிலைக்கு காரணம் ஆகும். உலக அளவில் சந்தைகள் நிலைத்தன்மைக்கு எப்போது திரும்பும்? எப்போது தங்கத்தின் விலை குறையும்? என்பது தெரியாத நிலையில், இடைப்பட்ட காலத்தில் திருமணம் உள்ளிட்ட சுப காரியங்களைச் செய்ய நிச்சயித் திருப்பவர்கள் தங்கம் வாங்குவதற்காக சில லட்சம் ரூபாயைக் கூடுதலாக செலவிட வேண்டி யிருக்கும். அதற்கு வசதியில்லாதவர்கள் வீட்டுத் திருமணம் உள்ளிட்ட நிகழ்வுகள் தடைபடவும் வாய்ப்புகள் உள்ளன என்பதுதான் கசப்பான உண்மை.

இதில் இன்னொரு உண்மை என்னவென்றால், ஆசியாவிலேயே இந்தியாவில்தான் தங்கத்தின் விலை அதிகம் ஆகும். இதற்குக் காரணம் தங்கத்தின் மீது வசூலிக்கப்படும் அளவுக்கு அதிகமான இறக்குமதி வரி தான். தங்கத்தின் மீது இறக்குமதி வரி வசூலிக்கும் கலாச்சாரம் சில ஆண்டுகளுக்கு முன்பு வரை இந்தியாவில் இல்லை.

2012-13 ஆம் ஆண்டில் நடப்புக் கணக்குப் பற்றாக்குறை அதிகமாக இருந்த போது, தங்க இறக்குமதியை குறைக்க அதன் மீதான இறக்குமதி வரியை அப்போதைய நிதியமைச்சர் ப.சிதம்பரம்தான் 2 விழுக்காடு என்ற அளவில் அறிமுகப்படுத்தி, படிப்படியாக 10% என்ற அளவுக்கு உயர்த்தினார். நடப்புக் கணக்குப் பற்றாக்குறை குறைந்தவுடன் இறக்குமதி வரி நீக்கப்படும் என்று சிதம்பரம் அளித்த வாக்குறுதி காங்கிரஸ் ஆட்சியில் நிறைவேற்றப்படவில்லை.

தங்கம் மீதான இறக்குமதி வரியை முற்றிலுமாக நீக்கவோ, கணிசமாக குறைக்கவோ அரசு முன்வர வேண்டும். அத்துடன் சேதாரம் என்ற பெயரில் நடக்கும் கொள்ளையையும் தடுக்க வேண்டும்” என்று ராமதாஸ் தெரிவித்துள்ளார்.